Thursday, June 2, 2011

حبة حاجات نفسى فيها




- نفسى اقعد عالبحر دلوقتى واشرب شيشه
-         نفسى فى اكله طعمها حلو قوى ويفضل طعمها فى بوقى
-         نفسى ماما تبطل تطبخ اكل صحى اوى كده
-         نفسى الدش ينزل ميه سخنه
-         نفسى ابطل خوف من القطط ... الموضوع زاد اوى ومنكد عليا كل الخروجات
-         نفسى اتعلم السواقه
-         نفسى ابقى دكتوره نفسيه
-         نفسى اعرف ايه اللى مزعلنى قوى كده


-         نفسى حد معين يكلمنى دلوقتى او يبعت لى رساله
-         نفسى اعرف انا عايزه ايه
-         نفسى ابقى كاتبه مشهوره جدا
-         نفسى اركب مركب واعيش كام يوم فى البحر
-         نفسى انزل البحر
-         نفسى انام بعمق ومحدش يصحينى
-         نفسى اختى اللى معايا فى الاوضه تختفى _ من الاوضه يعنى J
-         نفسى اعرف اكل بالخشبتين الصينى
-         نفسى اعمل عمره واموت فى الحرم الشريف
-         نفسى اعيش لوحدى
-         نفسى اشرب سجاير

-         نفسى ارجع اتعلم ناى تانى
-         نفسى اقابل كاظم الساهر صدفه
-         نفسى ابطل عبط شويه واكبر
-         نفسى ابقى عصبيه علشان اطلع فى اللى قدامى زى البابور
-         نفسى يبقى عندى بيت عالبحر مباشرة .. ويكون ملكى انا
-         نفسى كشرى التحرير يفتح تحت بيتنا
-         نفسى مبطلش كتابه واخرج كل الكلام والافكار اللى جوايا
-         نفسى اعيط وقت ما احب ومحدش يسالنى مالك
-         نفسى ما ابطلش اكل شيكولاته
-         نفسى الدنيا تمطر حالا واكون على كورنيش النيل
-         نفسى ماما توطى الراديو شويه الصبح
-         نفسى ابقى مثقفه جدا واقراء كل الكتب اللى فى الدنيا واشتريها
-         نفسى اعمل برنامج اذاعى
-         نفسى ابطل خناقات مع سواقين التاكسى
نفسى ادخل فيلم رومانسى فى السينما مع حبيبى _ على اعتبار ما سيكون




-         نفسى حد ياخدنى فى حضنه ( حد معين ) J
-         نفسى امشى جوا البحر علشان امشى وابص عليه فى نفس الوقت .... مبعرفش ابص عالبحر براحتى وانا بتمشى عالكورنيش رقبتى بتوجعنى
-         نفسى بابا يبطل يطلب الطلب على خمس مراحل .. اعمليلى كوباية شاى ... لا حطى عليها لبن ... هاتى كوباية ميه ... زودى معلقه سكر .... مفيش كيك مع الشاى ؟؟؟ خدى الكوبايه اغسليها
-         نفسى بابا ميقولش لا فى اول كل جمله _ تقريبا بقت بتخرج منه لا اراديه
-         نفسى يبصوا فى البطاقه كويس ويعرفوا ان انا كبرت
-         نفسى اقابل حب حياتى فى الاوبرا
-         نفسى ابقى منظمه شويه
-         نفسى انام بدرى واصحى .... لالالا مش نفسى خااالص
-         نفسى الليل ميخلصش
-         نفسى اتكلم سبع لغات
-         نفسى ماما تبطل سؤال بيستفزنى جدا ( افتح لك علبة تونه؟؟؟ وانا مش بطيق ريحة التونه L



-         نفسى اقعد على قهوه بلدى واشرب شيشه عنب فاخر ونعناع والميه تبقى ساقعه ... دى وصفة سورى من بلدها مش هتندموا J
-         نفسى احب فى قصة حب قويه جدا ونبقى هنتشحتف على بعض
-         نفسى اجرب طعم الحشيش نفسى بجد
-         نفسى ابطل ضحك عالفاضيه والمليانه
-         نفسى اجرب ابقى قلية الذوق مع الناس .. مبعرفش ابدا
-         نفسى اركب موتوسيكل واحضن اللى سايقه اوى ... ماهو هيكون تبعى J
-         نفسى اقابل صدفه كل الناس اللى واحشانى ومش بعرف اشوفها وقت ما بيكون نفسى اشوفها
-         نفسى اتمتع بقوه خارقه ما
-         نفسى فى انسان صديق او حبيب يفهمنى زى ما انا ومحتاجش اتجمل قدامه
-         نفسى اتفرج على فيلم الشموع السوداء
-         نفسى ابنى دار ايتام واجمع كل الاطفال اللى فى الشارع فيها
-         نفسى افتح محل ورد
-         نفسى الشوارع تبقى مكيفه علشان اعرف اتمشى فى الصيف براحتى
-         نفسى ماما تسالنى قبل ما تغسل هدومى
-         نفسى مصر تاخد كاس العالم
-         نفسى احرج عمرو اديب عالهوا
-         نفسى منى الشاذلى تغير الميك أب بتاعها اللى متغيرش من تمن سنين
-         نفسى ايام الثوره ترجع تانى وانزل التحرير واموت شهيده






-         نفسى الاقى معنى لحياتى
-         نفسى ابقى راجل
-         نفسى احضر حنة راجل ... بيقولوا بتبقى عظمه
-         نفسى اعرف احمد عز وكريم عبد العزيز حلوين اوى كده فى الحقيقه والا لاء؟
-         نفسى اعرف الحكمه من حاجه حصلت لى وقلبت حياتى ... حاجتين مش حاجه واحده
-         نفسى اتعرف على بنت مش ولابد واسالها كام سؤال كده محيرنى
-         نفسى ابقى سيناريست شاطره
-         نفسى ايام ثانوى ترجع ... كانت احلى ايام حياتى
-         نفسى حلم واحد من احلامى تتحقق
-         نفسى اعرف قلب الرجاله شغال ازاى ... بيحبوا ازاى ؟؟؟
-         نفسى الزمالك ياخد الدورى ... والله العظيم مش بتتريق ( انا اهلاويه جدا )
-         نفسى الاقى كنز
-         نفسى ابطل احب واتعلق بناس متستاهلش


-         نفسى احس بهدوء جوايا وسلام داخلى وراحة بال
-         نفسى اضرب احمد عز بالقلم على وشه
-         نفسى اروح فلسطين قوي
-         نفسى يبقالى صفحه عالفيس بوك باسمى ويبقى فيها اكتر من مليون مشترك
-         نفسى ماما تقتنع انى مش بالصوره اللى هى شايفانى بيها
-         نفسى اشوف كل اصحابى مره واحده
-         نفسى احضر فرح حد معرفوش وارقص
-         نفسى اتعلم الرقص
-         نفسى اقص شعرى كاريه ... بس مبيهونش عليا
-         نفسى اكون فى اكتر من مكان فى وقت واحد
-         نفسى اهتم بصحتى شويه
-         نفسى افتكر اشحن الموبيل
-         نفسى الاقى مفاتيحى اللى ضاعت ... الميداليه اللى ضااعت كانت اغلى هديه عندى
         
-         كان نفسى ازور دكتور مصطفى محمود فى المستشفى بس للاسف توفى قبل ما اروحله بيوم
-         نفسى اقابل ادهم صبرى ( رجل المستحيل ) فى الحقيقه
- نفسى اعرف ادهم صبرى هيتجوز منى توفيق والا لاء ... وللاسف د. نبيل فاروق رفض يجاوب السؤال ده فى حوار كنت بعمله معاه
-         نفسى اركب الة الزمن واروح عصور كتير بس احب نفس الراجل فى كل عصر ازوره
-         نفسى اخلص رواية مئة عام من العزله ...  بتلخبطنى جدا وكل شويه اجيبها من البدايه
-         نفسى اروح لدكتوره نفسيه تفهمنى شوية حاجات جوايا
-         نفسى فى راجل رومانسى يحطلى ورده عالمخده اشوفها اول ما اصحى
-         نفسى امى وابويا يكونوا راضيين عنى على طول
-         نفسى ربنا يحبنى
-          نفسى ابطل كتابه فى الموضوع دا بقى لانى اتخنقت بجد .... كل دى حاجات نفسى فيها ومش قادره اعملها؟؟؟
-          











5 comments:

  1. في تدوينات الواحد مبيعرفش يعلق عليها لانه حاسس انه اللي كاتبها بيبقي حاسسها قوي واي كلام للرد بيبقي مبتذل جدا بالنسبة للشحنة اللي اخدها في التدوينة

    رائعة...رغم ان في حاجات نفسك فيها اتكررت...ده معناه ان في حاجات بتحبيها اكتر من اي حاجة تانية

    علي الهامش...انا كمان عايز اضرب احمد عز بالقلم
    تحياتي

    ReplyDelete
  2. وهم بجد .. تدوينه وهميه جدا جدا جدا

    هتابع كتابتاك ان شاء الله بعد كده

    ReplyDelete
  3. احمد عيسى ... شكرا جدا على كلامك الجميل
    على الهامش مصر كلها عايزه تضرب احمد عز بالقلم على وشه :))


    احمد عادل ... كلامك اسعدنى جدا وشئ يشرفنى انك تتابعنى :)

    ReplyDelete
  4. هلي فكرة الشيشة العنب طلعت وهمية انا جربتها امبارح بعد ماقريت البوست ده

    ReplyDelete
  5. حلو ماقلك يا شيماء و انا كمان نفسي في حاجات كتييرة من اللي نفسك فيها بس برده في حاجات تانية منفسيش فيها من اللي نفسك فيها...هههه فهمتي حاجة؟!!

    ReplyDelete