كومبارس

الدنيا دى مسرح كبير

ودورى فيها دور حزين

كومبارس مدفون بالحياه

ادواره مليانه كلام

لكن ولا حد انتبه

ولا حد واخد باله منه

ولا حتى فى موهبته أشتبه

دوَر هناك...

عافر هنا ...

كان نفسه مره يطلع السما

كان نفسه يبقى نجمه من النجوم

يبص مره ع السما من غير غيوم

ينسى فى فراغ الفضا وحدته ...

وكل الهموم..

وبالرغم من انه كوميديان خطير

وتلاقى دايما ضحكته

سابقه كلامه ونكتته

سايب مشاكله وبلوته

لربه يحلها بحكمته

زى  ما يكون جاى الحياه يومين عالسريع

وعايز يلحق يعيش دنيته

ويدور هناك ...

ويعافر هنا

وتعدى يجى كام سنه

وهو ادواره كلها سكوت

ولا حد سامعه

وكأنه متركب له كاتم صوت

أهوه هنااااااك ...

فى اخر الصف واقف هناك

قطر حياته عدى مليان ذكريات

قطر لا له سكه ولا قضبان حديد

ولا حتى صفاره تسمعها من بعيد

طالع م العدم .. رايح للعدم

حياته محطه واحده .. اسمها الندم

ماهى كل سكته .. عاشها انسان صنم

قايم نايم بياكل ... بيرعى فى الغنم

كل اللى فالح فيه .. يلعن ابو الزمن

اخر ما فاض بيه قال خلاص

نشوف حل وسط

علشان ارضى المخرج ...

وزمايلى ف الوسط

لا انا عايز ابقى نجم من النجوم

ولا اخد دور بطوله

ولا اطلع فى البرامج كل يوم

كل الحكايه انى تعبت من السكوت

نفسى اقول ولو جمله واحده قبل ما اموت

مش مهم يا بشر كومبارس كومبارس

بس ع الاقل كومبارس بصوت